Skifti av nýtslugjaldi frá 2021 eftir avtalu við Uttanríkis- og Mentamálaráðið
Grundað á upplýsingarnar um brúkið á miðnámi, hægri lestri og Próvstovuni í skúlaárinum 2020/21, er avgerð tikin um at rinda út helvtina av pengunum, kr. 384.348,15, til føroyskar rættindahavar eftir fráboðan, samsvarandi grein 3 í reglugerðini hjá Fjølrit:
§ 3. VIÐURLØG FYRI SANNLÍKA NÝTSLU
Viðurløg fyri nýtslu, sum ikki ber til at eyðmerkja, og sum umfatar ein munandi part av
upphavsrættarfólki, verða býtt út til sannlíkar rættindahavarar eftir einari meting, sum inniheldur statistiska nýtslu, nýggj verk, stakroyndir og møgulig onnur viðkomandi parametur.
Víðari eftir grein 4 stk 2, stk 5.1 og stk 6:
§ 4. VIÐURLØG, SUM IKKI KUNNU BÝTAST ÚT
Stk. 2. Viðurløg, har mett verður, at tað fer at kosta meira enn 25% í umsitingargjaldi at finna viðkomandi upphavsrættarfólk, eru at meta sum viðurløg, sum ikki kunnu býtast út.
Stk. 5. Viðurløg, sum ikki kunnu býtast út, verða brúkt til:
1. At býta út til rættindahavarar til at framleiða nýggjar útgávur, nýggjar framsýningar og aðra nýgjørda framleiðslu innan øki, ið Fjølrit umsitur.
Stk. 6. Stjórnin tekur avgerð. Upphæddirnar skulu brúkast innan fyri virkisøkið hjá limafeløgum Fjølritar, tó uttan krav um limaskap.
Nýtslugjaldið verður býtt javnt millum allar fráboðanir, ið lúka omanfyrinevndu treytir.
Evsta freist at senda fráboðan er fríggjadagin 13. oktober 2023 kl. 15.00. Svarað verður um endaligu upphæddirnar umleið tvær vikur eftir freistina.
Treytir fyri útgjaldi
1) Viðkomandi má hava givið verk út* frammanundan, har útgávuárið er fyri 31. desember 2020.
*eitt verk er útgivið eftir grein 2 stk 2 í upphavsrættarlógini, tá ið tað er:
a) boðið alment til sølu, til láns, til leigu ella givið sum gáva,
b) sýnt fram alment,
c) framført alment.
2) Rættindahavi skal prógva útgivna verkið, eitt nú við at upplýsa ISBN, ISSN, ISMN, leinki til upplýsingar um útgávu, mynd av skrá, ella annað, ið greitt sigur nær og hvussu verkið er útgivið.
3) Upphæddin skal brúkast til arbeiði við at framleiða eitt ella fleiri nýggj verk innan eitt øki* Fjølrit í dag umsitur.
*Økini, Fjølrit í dag umsitur, eru
– tekstir (grein, yrkistekstur, fagurtekstur, týðing, yrking),
– mynd (myndlist, fotografi) og
– nótar (sangtekstur, nótar).
4) Hvørt nýtt verk skal vera ítøkiligt og kunna avmarkst sum eitt sjálvstøðugt verk, til dømis við einum serstøkum arbeiðstitli.
5) Fyri bæði útgivna verkið og nýggj verk er galdandi, at eintøk av verkinum antin eru framleidd í Føroyum, ella tey eru framleidd uttanlands við ætlan um útgávu í Føroyum.
6) Sama útgivna verk ella sama nýggja verk kann bert nýtast eina ferð til hetta umfarið av útgjaldi eftir fráboðan.
7) Útgávudagurin fyri nýggja verkið má vera eftir fráboðanarfreistina.
8) Hvør rættindahavi kann í mesta lagi fáa útgjald fyri fimm fráboðanir.
9) Harumframt skal rættindahavi hava skrásett seg hjá Fjølrit sum rættindahavi, áðrenn umsóknin verður send. Hevur tú ikki longu skrásett teg sum rættindahavi, ger tað so fyrst her.
Er tú í iva, um tú lýkur treytirnar, kanst tú senda teldupost til post@fjoelrit.fo ella ringja til 238600 ella 238601.
Fráboðanarfreistin er farin.